Innlent | mbl | 13.3.2016 | 20:46

Vilja tvö fjölbýlishús við Sogaveg

Staðsetning lóðanna tveggja sem um ræðir. Mynd/Reykjavík

Í vikunni var ákveðið á fundi umhverfis- og skipulagsráðs Reykjavíkur að að kynna fyrir hagsmunaaðilum hugmyndir THG Arkitekta um að rífa tvö hús við Sogaveg 73-75 og byggja á lóðinni og nærliggjandi lóð tvö fjölbýlishús með allt að 49 íbúðum á þremur hæðum. Verði að tillögunum verður eitt af stærri og dýrari einbýlishúsum borgarinnar rifið, en Sogavegur 75 var árið 2014 auglýstur fyrir 170 milljónir.

Samkvæmt hugmyndum arkitektastofunnar sem lagðar voru fyrir umhverfis- og skipulagsráð er gert ráð fyrir að húsnæðið við Sogaveg 73 verði rifið, en það er 48 fermetrar og var byggt árið 1942. Þá verði einnig húsið við Sogaveg 75 rifið, en það var byggt árið 1926 og viðbygging árið 1946. Er húsið samtals 581 fermetri að stærð og er meðal annars sérstakt íþróttaherbergi þar.

Hugmyndin er að sameina lóðirnar og byggja þar fjölbýlishús með 17-20 íbúðum sem verði 55-120 fermetrar að stærð hver. Fram kemur að í heild geti fjöldi íbúða mest orðið 49 talsins.

Gert er ráð fyrir að byggja tvö fjölbýlishús á lóðunum á Sogavegi 73-77. Gætu þar orðið allt að 49 íbúðir. Mynd/Reykjavík

Næsta lóð sem heitir Sogavegur 77 er óbyggð, en þar er gert ráð fyrir að reisa annað fjölbýlishús með 25-28 íbúðum sem verði 55-130 fermetrar að stærð. Gert er ráð fyrir að bæði húsin verði þriggja hæða þar sem hver hæð er aðeins inndregnari en hæðin fyrir neðan.

Í greinargerð sem fylgir umsókninni kemur fram að á lóðinni við Sogaveg 77 séu há grenitré sem gert er ráð fyrir að varðveita. Undir báðum húsunum er svo gert ráð fyrir bílageymslum.

Lóðirnar tvær afmarkast af Sogavegi og Miklubraut, en til vesturs er svo húsnæði Votta Jehóva og til austurs eru slaufugatnamót Miklubrautar og Réttarholtsvegar. Árið 2014 hafði Hjallastefnan óskað eftir að fá að reka leik- og grunnskóla í húsunum við Sogaveg 73-75, en því var hafnað af borginni.

Annar eigandinn tengdur hrunmálum Glitnis

Það er félagið S73-77 ehf. sem er eigandi Sogavegs 75, en eigendur þess eru Magnús Magnússon og Magnús Pálmi Örnólfsson. Magnús Pálmi er fyrrverandi yfirmaður eigin viðskipta Glitnis og fékk hann meðal annars friðhelgi frá lögsókn í tveimur málum sem hafa verið á dagskrá dómstóla; Stím-málið og Aurum-holding málið. Ekki er vitað hvort hann hafi fengið álíka friðhelgi í markaðsmisnotkunarmáli Glitnis sem ákært var í á dögunum.

Magnús Pálmi Örnólfsson við aðalmeðferð Stím-málsins í fyrra. Árni Sæberg

Við aðalmeðferð Stím-málsins í fyrra ásökuðu lögmenn ákærðu í málinu Magnús Pálma um að hafa fengið greiðslu í gegnum flókið net einkahlutafélaga frá vinum sínum sem hann átti að hafa bjargað þegar sjóður sem Magnús Pálmi stýrði keypti skuldabréf útgefið af Stím og kom þar með í veg fyrir tap þeirra. Rakti lögmaðurinn lánveitingar milli félaganna þangað til félag í eigu Magnúsar Pálma tapaði tugum milljóna vegna veðmálastarfsemi (e. betting activities).