Stöðvaði starfsemi pókerklúbbs

Lögreglan á höfuðborgarsvæðinu hafði afskipti af einstaklingum sem eru grunaðir um að hafa stundað fjárhættuspil í húsnæði í Grafarvogi um sl. helgi. Var staðnum lokað og húsnæðið innsiglað. Enginn var handtekinn en rannsókn málsins stendur yfir.

Málið kom upp við eftirlit lögreglu, þ.e. að í húsnæðinu væri stunduð pókerstarfsemi. Þegar lögreglumenn komu á staðinn, aðfararnótt laugardags, sátu þar um 10 manns að spilum. Skýrslur voru teknar af fólki á staðnum og hald lagt á muni, m.a. fjármuni og önnur gögn. 

Meint brot varða við 183. gr. almennra hegningarlaga, en þar segir: „ Sá, sem gerir sér fjárhættuspil eða veðmál að atvinnu eða það að koma öðrum til þátttöku í þeim, skal sæta sektum …¹⁾ eða fangelsi allt að 1 ári, ef miklar sakir eru.“

Rannsókn málsins stendur yfir. Samkvæmt upplýsingum frá lögreglu er ekki algengt að lögregla hafi afskipti af fólki sem er grunað um að stunda fjárhættuspil. 

• Blogga um frétt