Betur virðist hafa farið en útlit var fyrir í fyrstu, er kona slasaðist alvarlega eftir bílveltu á Skeiðavegi, rétt sunnan við Miðfell, um fimm leytið í nótt.
Að sögn lögreglunnar á Suðurlandi hafa borist fregnir af því að konan sé búinn að fara í myndatöku og betur líti út með áverkana en talið var í fyrstu
Konan var flutt alvarlega slösuð með þyrlu Landhelgisgæslunnar á Landspítalann eftir bílveltuna. Fjórir aðrir voru í bílnum og voru þeir allir fluttir með sjúkrabílum á sjúkrahús.
Að sögn varðstjóra í lögreglunni á Suðurlandi voru tveir þeirra fluttir á sjúkrahúsið á Selfossi en tveir á bráðamóttöku Landspítalans. Áverkar þeirra eru minni en konunnar sem flutt var með þyrlunni, en hún er með höfuðáverka. Ekki er vitað hvað olli slysinu en ökumaðurinn er ekki grunaður um ölvun við akstur. Fólkið í bílnum eru ekki erlendir ferðamenn.
Rannsókn slysins er lokið á vettvangi.