Ásta Guðrún Helgadóttir, þingmaður Pírata, hefur tekið saman breytingar milli úthlutun til íslenskra nemenda erlendis á framfærslu Lánasjóðs íslenskra námsmanna frá árunum 2013 til 2017 og breytingarnar sem þar hafa orðið og birt á Facebook síðu sinni. „Ég fékk sent yfirlitsdæmi og byrjaði að reikna þetta saman þar sem mér þykir þetta áhugavert,“ segir Ásta Guðrún í samtali við mbl.is.
Sjá frétt mbl.is: Lán námsmanna erlendis lækka um 20%
„Í sumum tilfellum hafa kjör námsmanna rýrnað um rúm 30% á þessu fjögurra ára tímabili. Milli ára er allt að rúmlega 20% skerðing á framfærslu á mánuði. Það getur ekki talist vera annað en forsendurbrestur fyrir íslenska námsmenn erlendis að lánaupphæð þeirra sem þeir geta fengið hafi rýrnað um allt að 30% frá því að þeir byrjuðu að stunda nám,“ segir Ásta Guðrún.
Dæmið um Þýskaland stendur Ástu Guðrúnu næst, en hún var búsett þar um hríð. „Segjum sem svo að þú hafir byrjað í námi í Þýskalandi árið 2013 og fékkst þá 1300 evrur á mánuði til að lifa af, miðað við það að þú sért í námi 9 mánuði ársins eins og LÍN lítur á það. En í raun er þetta lægri upphæð ef þú lítur til 12 mánaða, eins og venjulegt ár er.“ Ásta Guðrún bendir á að 1300 evrurnar eru nú orðnar að 860 evrum, eða um 120.000 krónum, á mánuði, miðað við 9 mánuði eins og LÍN gerir, en 645 evrur, eða 90.000 krónur, miðað við 12 mánuði.
„Ég er á því að það fer að verða eitt stærsta hagsmunamál íslenskra stúdenta að fá það viðurkennt að stúdentar eru stúdentar 12 mánuði á ári, en ekki 9 mánuði á ári eins og úthlutunarreglur gera ráð fyrir,“ segir Ásta Guðrún.
Ásta Guðrún telur því mikilvægt að endurskoða uppbyggingu íslenska námskerfisins. „Vandamálið með íslenskt námskerfi er að það er svolítil arfleifð frá þessu gamla sveitasamfélagi, þegar fólk fór í nám að hausti þegar fyrri eða seinni leitir voru búnar og komu til baka við sauðburð. Þetta eru 8-9 mánuðir, en erlendis ertu kannski að byrja í námi í október, búinn í febrúar, byrjar aftur í mars og ert búinn í júlí. Þess á milli færði kannski vinnu eða starfsnám tengt náminu eða sækir fyrirlestra, þannig uppbyggingin er allt öðruvísi.“
Ásta Guðrún segir forsendubrestinn einnig vera fólginn í því að LÍN geri ráð fyrir því að allir nemendur hafi tök á að vinna þá mánuði sem þeir eru ekki í skólanum. „Það er bara forsenda sem er ekki endilega hægt að gefa sér. Þegar þú ert námsmaður erlendis er ekki einu sinni víst að þú megir vinna.“
Ásta Guðrún setur einnig spurningamerki við þá greiningu sem LÍN byggir úthlutunarreglur sínar á. Hún segir til dæmis að það gangi einfaldlega ekki upp að námsmaður í Þýskalandi geti lifað á 860 evrum á mánuði. „Er startkostnaður reiknaður með til dæmis? Er verið að miða við 18 ára krakka sem eru að fara í skiptinám í fyrsta skipti eða er verið að miða við fullorðinn einstakling sem þarf að framfleyta sér? Það er eins og það sé í lagi að námsmenn séu að takmarka lífsgæði sín því við eigum að vera fátæk.“
Sjá frétt mbl.is: SÍNE setur fyrirvara á greiningu LÍN
Ásta Guðrún segir mikilvægt að það standi íslenskum nemum að stunda nám sitt, eða hluta þess, erlendis. „Ísland er takmarkandi, það er ekki allt í boði hérna en það er líka allt í lagi. Við erum lítið land og það er ef til vill betra að fólk geti sótt sér menntun erlendis. Við eigum að reyna að hvetja fólk til að fara út í nám. Miðað við hvernig úthlutunarreglur LÍN hafa verið undanfarin ár eru það ekki skilaboðin sem nemendur eru að fá.“