Slysavarnafélagið Landsbjörg hefur ákveðið að blása til átaks í slysavörnum hjólreiðafólks. „Kanntu að hjóla?“ nefnist það og hófst í gær og stendur allan maímánuð.
Hjólreiðaslysum hefur fjölgað um u.þ.b. 400% á Íslandi síðasta áratug samkvæmt tölum Samgöngustofu. Tugir alvarlegra hjólreiðaslysa verða ár hvert og varð banaslys í fyrra.
Í tilefni átaksins hjóluðu í gær 80 félagar úr Slysavarnafélaginu Landsbjörg frá bækistöðvum sínum að Gróubúð á Grandagarði þar sem Björgunarsveitin Ársæll og Slysavarnadeildin í Reykjavík hafa aðsetur. Gefinn hefur verið út bæklingur þar sem farið er yfir helstu atriði sem hjólreiðafólk þarf að kunna skil á, að því er fram kemur í Morgunblaðinu í dag.