Innlent | mbl | 2.5.2016 | 18:50 | Uppfært 19:33

Dorrit átti hlut í aflandsfélögum

Forseti Íslands Ólafur Ragnar Grímsson og Dorrit Moussaieff forsetafrú mbl.is/Ómar Óskarsson

Dorrit Moussaieff, eiginkona Ólafs Ragnars Grímssonar forseta Íslands, hefur tengst minnst fimm bankareikningum í Sviss í gegnum fjölskyldu sína og að minnsta kosti tveim aflandsfélögum.

Þetta kemur fram í gögnum sem uppljóstrarar létu Le Monde, Süddeutshe Zeitung og ICJ fá og kallast Swiss Leaks og Panama Papers. Greint er frá þessu í frétt á heimasíðu Reykjavik Media í dag. Auk þess birtist fréttin víða annarsstaðar í heimspressunni, meðal annars á vef The Guardian og Süddeutche Zeitung.

Í fréttinni segir að fjölskylda Dorritar, þar á meðal systur hennar tvær, hafi átt reikninga með allt að 80 milljón dollara innistæðum í HSBC bankanum í Sviss árin 2006 og 2007. Dorrit virðist þó sjálf ekki hafa komið að flestum reikningunum.

Hagnaðist Dorrit á aflandsviðskiptum foreldra sinna?

Gögnin sýna, að því er Reykjavik Media tekur fram, engin lögbrot Dorritar og það er ekki ólöglegt að eiga aflandsfélög eða svissneska bankareikninga. Gögnin vekja engu að síður upp spurningar um hvort að forsetafrú Íslands hafi hagnast á aflandsviðskiptum foreldra hennar og hvort gerð hafi verið grein fyrir eignum hennar.

Auk þess kemur fram í fréttinni að upplýsingarnar sýni að Dorrit hafi átt hlut á móti fjölskyldu sinni í Jaywick Properties Inc, sem skráð er til heimilis á Bresku Jómfrúareyjunum og félaginu Moussaieff Sharon Trust.

Á vef Reykjavik Media segir að Dorrit hafi ekki viljað svara spurningum um hvort hún tengdist félögunum þegar eftir því var leitað. Viðskipti sín hefðu alltaf verið í samræmi við lög og að þau væru einkamál.

Í yfirlýsingu sem send var Reykjavik Media sagði Dorrit að fjárhagur sinn og Ólafs Ragnars væri og hefði alltaf verið aðskilinn og þá sagði Örnólfur Thorsson forsetaritari í skriflegu svari að forsetinn hefði enga vitneskju um félögin og að hann hefði aldrei heyrt um þau. Þá sagði í svari Örnólfs að forsetinn hefði aldrei haft upplýsingar um aðra meðlimi Moussaieff fjölskyldunnar.