Þingsályktunartillaga Árna Páls Árnasonar, formanns Samfylkingarinnar, um að ríkisstjórnin beiti sér fyrir alþjóðlegum viðskiptaþvingunum gagnvart lágskattaríkjum var rædd á Alþingi í dag. Markmið aðgerðanna verði að koma í veg fyrir leynd yfir eignarhaldi félaga í lágskattaríkjum og koma í veg fyrir skattaundanskot.
Árni Páll sagði þörf á því að marka skýra alþjóðlega stefnu í málinu í ljósi þeirra upplýsinga sem hafa komið fram í Panamaskjölunum. Hann sagði athyglisvert að ekki eitt bandarískt fyrirtæki eða Bandaríkjamenn hafi komið við sögu í Panamaskjölunum. „Heildarmyndin á þessu máli kann að vera stærri og flóknari en við höfum gert okkur í hugarlund.“
Svandís Svavarsdóttir, þingmaður Vinstri grænna, spurði Árna hvort væntingarnar um að Ísland geti verið í fararbroddi á heimsvísu séu raunhæfar. „Hversu trúverðugt er það á meðan við erum enn með tvo ráðherra Íslands sem eru í Panamaskjölunum? Gengur það að halda því fram að við ætlum að vera í forystu í þessum málum á meðan ríkisstjórnin sjálf hefur ekki tekið betur til hjá sér en raun ber vitni?,“ spurði Svandís.
Frosti Sigurjónsson, þingmaður Framsóknarflokksins, lýsti yfir stuðningi sínum við markmið aðgerðanna en taldi ekki rétt að Ísland ætti að vera í forsvari fyrir þeim. „Ef markmiðið er að við ætlum að bæta ímynd landsins út á við þurfum við að gera trúverðugri hluti. Við verðum að sjá til þess að við sjálf séum ekki skattaskjól. Ísland er skattaskjól á ýmsa vegu,“ sagði hann og nefndi útlendinga og stóriðju sem dæmi.