Aðalmeðferð í Aurum-holding málinu mun hefjast 19. október næstkomandi og standa í 7-8 daga. Þetta var ákveðið í fyrirtöku málsins í dag í Héraðsdómi Reykjavíkur, en Ólafur Þór Hauksson, héraðssaksóknari og saksóknari málsins staðfestir dagsetninguna við mbl.is
Málið er nú endurflutt, en áður hafði Hæstiréttur ógilt niðurstöðu málsins vegna ummæla sérfróðs meðdómara á opinberum vettvangi, en ummælin þóttu benda til að hann hefði ekki verið óhlutdrægur í garð saksóknara fyrir uppkvaðningu dómsins. Meðdómandinn er bróðir Ólafs Ólafssonar fjárfestis sem var dæmdur í Al-thani málinu.
Nokkuð hefur verið deilt í aðdraganda þessa máls, en fyrr í mánuðinum staðfesti Hæstiréttur úrskurð héraðsdóms sem sem hafnaði beiðni þriggja af fjórum ákærðu í málinu þess efnis að fá nýja matsmenn til að meta verðmæti félagsins Aurum-holding.
Saksóknari málsins hafði áður óskað eftir því að möt undir- og yfirmatsmanna frá fyrri aðalmeðferð yrðu lögð fyrir í málinu. Héraðsdómur hafnaði því en Hæstiréttur snéri því við.
Í ljósi þeirrar niðurstöðu óskuðu verjendur í málinu eftir því að nýtt mat yrði gert sem heyrði undir þetta mál beint. Sögðu þeir að ný gögn hefðu komið fram í málinu síðan fyrra matið var gert.
Möt sem þessi gætu skipt talsverðu máli fyrir niðurstöðu málsins enda er verðmæti félagsins Aurum-holding eitt af lykilatriðum þess.
Í málinu eru ákærðir þeir Lárus Welding, fyrrverandi bankastjóri Glitnis, Jón Ásgeir Jóhannesson, einn aðaleigandi bankans, Magnús Arnar Arngrímsson, fyrrverandi framkvæmdastjóri fyrirtækjasviðs, og Bjarni Jóhannesson, fyrrverandi viðskiptastjóri. Þeim er gefið að sök umboðssvik eða hlutdeilt í umboðssvikum vegna sex milljarða króna lánveitingar Glitnis banka til félagsins FS38 í júlí 2008.
Aurum Holding-málið hefur verið lengi til meðferðar í dómskerfinu, en upphaflega var ákært í málinu í desember 2012 og það þingfest í janúar 2013. Aðalmeðferð málsins fór svo fram á fyrri hluta ársins 2014. Voru allir sakborningar í málinu sýknaðir, en Hæstiréttur ógilti svo dóminn vegna ummæla meðdómara eins og áður segir. Þá var settum dómara málsins, Guðjóni St. Marteinssyni gert að víkja til að gæta óhlutdrægni í málinu. Síðan þá hefur talsvert verið tekist á um dómara málsins sem og matsskýrslur. Málið hefur því verið fyrir dómstólum núna í rúmlega 3 ár.