Undanfarna daga hafa allmargir ökumenn verið kærðir fyrir hraðakstur í umdæmi lögreglunnar á Suðurnesjum. Sá sem ók hraðast mældist á 150 km hraða, en hann ók eftir Garðskagavegi þar sem hámarkshraði er 90 km á klukkustund.
Lögreglan segir að ökumannsins bíði 130.000 króna fjársekt, svipting ökuleyfis í einn mánuð og þrír refsipunktar í ökuferilsskrá.
Þá var einn ökumaður til viðbótar handtekinn vegna ölvunaraksturs og annar vegna fíkniefnaaksturs. Sá síðarnefndi var réttindalaus undir stýri.