Sveitarfélög hafa að undanförnu verið að afgreiða ársreikninga fyrir seinasta ár og er ljóst að reksturinn var mörgum þungur.
Mun meiri bjartsýni er hins vegar á árið í ár heldur en gert var ráð fyrir í útkomuspám sveitarfélaga í fyrra, skv. upplýsingum Halldórs Halldórssonar, formanns Sambands íslenskra sveitarfélaga.
„Fjárhagsáætlanir sveitarfélaga eru gegnumgangandi mun bjartsýnni fyrir árið 2016 og er reiknað með töluverðri tekjuaukningu í flestum tilvikum,“ segir hann í Morgunblaðinu í dag. Útlit er fyrir að skatttekjur sveitarsjóða aukist umtalsvert á þessu ári af hærri launum sem samið var um í kjarasamningum en kostnaður þeirra jókst mikið á seinasta ári þegar gengið var frá samningum við starfsmenn.