Fjölmenningardagurinn er haldinn hátíðlegur í dag, en hann hófst formlega með fjölþjóðlegri skrúðgöngu frá Skólavörðuholti klukkan 13. Þátttakendur voru margir hverjir klæddir þjóðbúningum frá hinum ýmsu löndum sem lífgaði upp á gönguna, samkvæmt tilkynningu frá Reykjavíkurborg.
Þegar í Hörpu kom hófst hátíðin með kynningar- og sölubásum innandyra og matarmarkaði í tjaldi fyrir utan. Í Kaldalóni er svo skemmtidagskrá þar sem boðið er upp á sextán atriði, meðal annars dans frá Filipseyjum, Mexíkóskt íslenskt tónlistaratriði, Balkandans, Múltíkúltikórinn og margt fleira.
„Ljóst er að dagurinn á sér fastan sess í hugum borgarbúa því mikill fjöldi fólks er í Hörpu og troðið í Kaldalóni þar sem skemmtiatriðin standa yfir. Endilega leggið leið ykkar í Hörpu og njótið fjölbreytileikans sem þar er í boði,“ segir í tilkynningunni.
Hér má finna dagskrá Fjölmenningardagsins.