Í nótt urðu tveir jarðskjálftar af stærð 3,1 kl. 00.57 og 3,6 kl. 03.31 á norðurbrún Bárðarbunguöskjunnar. Nokkrir eftirskjálftar hafa fylgt í kjölfarið.
Nokkur skjálftavirkni er á svæðinu. Hinn 26. maí sl. mældist skjálfti að stærð 3,3, hinn 31. maí mældist skjálfti að stærð 3,4 og 5. júní mældist einnig skjálfti að stærð 3,4.
Sigurdís Björg Jónasdóttir, náttúruvársérfræðingur hjá Veðurstofunni, hefur sagt í þessu samhengi að grannt sé fylgst með gangi mála en ekkert bendi til þess að nokkuð óeðlilegt sé á ferðinni.
Uppfært kl. 9.23
Samkvæmt upplýsingum frá Veðurstofu Íslands voru skjálftarnir í nótt svipaðir og hafa orðið síðustu vikur í öskjubrún Bárðarbungu. Skjálftarnir endurspegli vaxandi þrýsting í kvikuhólfi og er atburðarás sem þessi algeng eftir hræringar líkt og þær sem urðu í Bárðarbungu 2014 og 2015. Ekkert bendir til þess að annað eldgos sé í aðsigi í jöklinum á næstunni.