Í lögfræðiáliti sem seðlabankastjóri kallaði eftir er komist að þeirri niðurstöðu að aðstoðarseðlabankastjóri sé ekki undirmaður bankastjórans. Niðurstaðan byggist á því að aðstoðarbankastjórinn sé staðgengill og skipaður af ráðherra.
Kallað var eftir álitinu í kjölfar þess að bankaráð Seðlabankans fjallaði um mögulegt vanhæfi seðlabankastjóra í máli sem var til meðferðar hjá bankanum.
Um vanhæfi starfsmanna hjá hinu opinbera gilda sérstakar reglur þegar undirmaður fær til úrlausnar mál er varðar sérstaka og verulega hagsmuni yfirmanns. Í lögum segir að seðlabankastjóri setji reglur um umboð aðstoðarseðlabankastjóra til að skuldbinda bankann með undirskrift sinni, að því er fram kemur í fréttaskýringu um mál þetta í Morgunblaðinu í dag.