Líðan karlmannsins sem liggur á gjörgæsludeild Landspítalans eftir harðan þriggja bíla árekstur á Öxnadalsheiðinni í gærmorgun er stöðug. Maðurinn er á fimmtugsaldri.
Einn lést í slysinu sem varð er bíll var að taka fram úr annarri bifreið í þann mund er lítil rúta á norðurleið kom á móti bílunum. Bifreiðin sem var að fara fram úr valt út af veginum, en rútan og hinn bíllinn skullu saman.
Karlmaðurinn sem nú dvelur á gjörgæslu var ökumaður í annarri bifreiðinni. Hann var upphaflega fluttur til Akureyrar en tekin var ákvörðun um að flytja hann með sjúkraflugi til Reykjavíkur.
Í rútunni voru 12 farþegar auk bílstjóra. Allir voru þeir útskrifaðir af Sjúkrahúsinu á Akureyri eftir skoðun.
Ekki hafa fengist nánari upplýsingar um tildrög slyssins eða rannsókn þess hjá lögreglu.
Frétt mbl.is: Fluttur á gjörgæslu eftir slysið