Íslendingar 442 þúsund árið 2065

Mannfjöldi á Arnarhóli.
Mannfjöldi á Arnarhóli. mbl.is/Rósa Braga

Mannfjöldaspá Hagstofunnar fyrir næstu fimmtíu árin gerir ráð fyrir því að Íslendingar verði orðnir 442.000 talsins árið 2065. Samkvæmt hæstu spá gæti fjöldinn jafnvel farið yfir hálfa milljón. Fjórðungur þjóðarinnar verður 65 ára eða eldri árið 2061.

Spáin er byggð á tölfræðilíkönum fyrir búferlaflutninga, frjósemi og dánartíðni. Hún er þrískipt og byggja spáafbrigðin á mismunandi forsendum um hagvöxt, frjósemishlutfall og búferlaflutninga. Í háspánni verða íbúar 523 þúsund í lok spátímabilsins en 369 þúsund samkvæmt lágspánni. Til samanburðar var mannfjöldinn 332 þúsund 1. janúar 2016.

Fæddir verða fleiri en dánir á hverju ári spátímabilsins í mið- og háspá. Samkvæmt lágspánni verða dánir hins vegar fleiri en fæddir á hverju ári frá og með árinu 2044, að því er kemur fram í frétt á vef Hagstofunnar.

Meðalævi karla og kvenna við fæðingu mun halda áfram að lengjast. Nýfæddar stúlkur árið 2016 geta vænst þess að verða 83,6 ára gamlar en nýfæddir drengir 79,6 ára. Stúlkur sem fæðast árið 2065 geta vænst þess að verða 88,6 ára en drengir 84,3 ára.

Samkvæmt spánni verður fjöldi aðfluttra hærri en fjöldi brottfluttra ár hvert, fyrst og fremst vegna erlendra innflytjenda. Íslendingar sem flytja frá landinu verða áfram fleiri en þeir sem flytja til landsins. 

Yngri en flestar Evrópuþjóðir

Hlutfall 65 ára og eldri fer yfir 20% af heildarmannfjölda árið 2035 og yfir 25% árið 2061.
Frá árinu 2049 verða þeir sem eru 65 ára eða eldri í fyrsta sinni fjölmennari en þeir sem eru yngri en tvítugir.

Þótt þjóðin sé að eldast og fólksfjölgun verði fremur hæg þá segir Hagstofan að Íslendingar séu nú, og verði enn um sinn, mun yngri en flestar Evrópuþjóðir. Árið 2060 verði þannig meira en þriðjungur Evrópubúa eldri en 65 ára en einungis um fjórðungur Íslendinga.

Frétt á vef Hagstofunnar um mannfjöldaspána

mbl.is
Fleira áhugavert
Fleira áhugavert