Héraðsdómur Reykjaness sakfelldi í gær tvo karlmenn fyrir þjófnað á olíu og bensíni frá Atlantsolíu. Þá var annar þeirra jafnframt sakfelldur fyrir peningaþvætti. Var sá dæmdur í níu mánaða skilorðsbundið fangelsið en fresta skal fullnustu sex mánaða af refsingunni.
Var hinn dæmdur í sex mánaða skilorðsbundið fangelsi en fresta skal fullnustu fjögurra mánaða af refsingunni.
Mennirnir opnuðu eldsneytisdælur og tengdu þannig að einungis greiddist lítill hluti af því eldsneyti sem þær dældu yfir í 200 lítra tunnur.
Annar mannanna seldi síðan eldsneytið áfram til nokkurra aðila.
Mennirnir játuðu skýlaust brot sín fyrir dómi.
Brotin áttu sér stað frá maí 2013 til mars 2014.
Segir í dómnum að háttsemi þeirra hafi falið í sér einhliða og heimildalausa töku á eldsneyti. Létu mennirnir líta svo út sem þeir væru á löglegan hátt að versla eldsneyti á afgreiðslustöðvum Atlantsolíu og tóku þannig meðvitaða ákvörðun um að komast með ólögmætum hætti yfir verðmæti sem tilheyrðu öðrum. Fór háttsemin því fram með leynd.