Undirbúningur fyrir sýningu á leik Íslands gegn Frakklandi á EM við Arnarhól í Reykjavík á sunnudagskvöld er í fullum gangi. Komið verður fyrir stærri skjá og enn öflugra hljóðkerfi til að upplifun áhorfenda verði sem allra best.
Þetta kemur fram í frétt á vef Reykjavíkurborgar.
Sviðið verður neðst í brekkunni við Lækjargötu og ættu því áhorfendur á Arnarhóli að sjá vel á enn stærri skjá. Hljóð X, sér um uppsetningu á skjánum og tæknilega hlið framkvæmdarinnar ásamt Manhattan Marketing.
<br/>Lokað verður fyrir umferð á nærliggjandi götum frá klukkan 16.00 en útsending hefst klukkan 17.00. Lokunin stendur til klukkan 23.00 og þrenging í Lækjargötu þar til búið er að ganga frá svæðinu við Arnarhól. Búist er við að mikill mannfjöldi leggi leið sína þangað til að fylgjast með leiknum.
<br/>Þetta kvöld verður slökkt á skjánum á EM-torginu og leikurinn því aðeins sýndur við Arnarhól.
Um er að ræða samvinnuverkefni Reykjavíkurborgar, Íslenskrar Getspár, Landsbankans, Icelandair, Coca-Cola, KSÍ, N1, Símans og Borgunar.