84 athugasemdir voru gerðar við fyrstu úttekt Sameinuðu þjóðanna á stöðu mannréttindamála hér á landi, en flestar þeirra lutu að fullgildingu samninga eða innlendum eftirlitskerfum.
Innanríkisráðuneytið hefur nú birt drög að skýrslu um stöðu mannréttindamála á Íslandi, en birting hennar er hluti af annarri lotu úttektarinnar. Sú fyrri fór fram árið 2011 og er í drögunum greint frá því hvernig brugðist hefur verið við þeim athugasemdum sem fram komu að lokinni fyrstu lotu.
Í skýrslunni er m.a. fjallað um jafnréttismál, kynþáttafordóma, réttindi hinsegin fólks, málefni innflytjenda og hælisleitenda, réttindi fatlaðs fólk, málefni fanga og mansal, að því er fram kemur í umfjöllun um skýrsluna í Morgunblaðinu í dag.