Embætti sýslumannsins á höfuðborgarsvæðinu mun flytjast í nýtt húsnæði í Hlíðasmára 1 í Kópavogi í haust. Þá verða lagðar niður skrifstofur gömlu embættanna þriggja í Reykjavík, Kópavogi og Hafnarfirði. Með lögum sem tóku gildi þann 1. janúar 2015 voru sýslumannsembættin á landinu sameinuð.
Þórólfur Halldórsson, sýslumaður á höfuðborgarsvæðinu, segir það flókið mál að flytja svo rótgróna stofnun sem embættið er en það verður gert í áföngum á tímabilinu frá 1. september til 1. nóvember. „Aðalatriði er að nýta þau tækifæri sem felast í sameiningu þessara þriggja embætta og reyna að gera það sem hægt er til þess að samlegðaráhrifin verði sem mest. Þannig nýtist skattfé betur og vonandi tekst okkur jafnframt að bæta bæði aðstöðu starfsmanna og viðskiptavina,“ segir Þórólfur.
Ekki var gert ráð fyrir sérstökum fjárframlögum vegna breytingarkostnaðar og stendur embættið því frammi fyrir því að þurfa að ganga í gegnum þessar breytingar af þeim fjárheimildum sem það hefur af fjárlögum. Þórólfur segir að fastráðnir starfsmenn haldi sínum störfum við sameininguna en ekki verði sjálfkrafa ráðið á ný í þær stöður þegar fólk lætur af störfum vegna aldurs.
Sameining embættanna í eitt húsnæði hófst með þeim hætti að gerð var húsrýmisáætlun og auglýst eftir húsnæði. Í húsrýmisáætlun voru gerðar þær kröfur að það húsnæði sem tekið yrði á leigu uppfyllti ákveðnar kröfur, til dæmis í tengslum við afgreiðslu vegabréfa. „Það er sérstaklega gert ráð fyrir því að bæta þá aðstöðu og samhliða því verða væntanlega teknar í notkun nýjar vélar og nýtt tölvukerfi sem mun að auki hraða afgreiðslu,“ segir Þórólfur.
Hægt verður að skipuleggja alla afgreiðslu mun betur og mun það skila sér í auknum þægindum bæði fyrir starfsmenn og viðskiptavini. Spurður hvort til standi að taka upp einhvers konar pöntunarkerfi eins og þekkt eru annars staðar á Norðurlöndunum segir Þórólfur það allt í skoðun en líklega verði eitthvert val í boði hvað það varðar.
Hann segir ánægjulegt að nýja skrifstofan verði til húsa í miðju höfuðborgarsvæðisins samkvæmt þeirri skilgreiningu sem svæðisskipulag höfuðborgarsvæðisins gerir ráð fyrir þannig að sem styst verði fyrir sem flesta til sýslumannsins. Með sameiningunni er verið að hagræða með því að setja samskonar starfsemi sem var í gangi á þremur stöðum undir eitt þak. Þessar breytingar eru að nokkru leyti að frumkvæði Þórólfs, sem ráðuneytið síðan samþykkti, en með þeim er sýslumannsembættið að fara úr um 4.700 fermetrum niður í um 2.900 fermetra.