„Mér finnst þetta sorglegt, svona er ekki hægt að líða,“ segir Guðmundur Kristjánsson útgerðarmaður um niðurstöðu aðalfundar Vinnslustöðvarinnar hf. sem haldinn var á miðvikudaginn.
Samkvæmt heimildum Morgunblaðsins spruttu upp miklar deilur á fundinum þegar kjósa átti stjórnarmenn í aðalstjórn og varastjórn. Var atkvæðaseðlum dreift til fundarmanna og hafði hver maður atkvæði í samræmi við eign sína í félaginu.
Þegar talningu var lokið kom í ljós að tvær konur og tveir karlar voru komin í aðalstjórn en tveir menn voru jafnir um fimmta sætið. Einnig kom í ljós að einn atkvæðaseðill hafði ekki skilað sér í kjörkassa. Hófust þá deilur um það hvort kasta ætti hlutkesti um það hver yrði fimmti maður í stjórn eða hvort hluthafafundur ætti að ákveða það. Var fundarstjóri þá kallaður til að kveða upp úr um það en ákvað hann þess í stað að ógilda kosninguna þegar ljóst varð að einn atkvæðaseðill hafði ekki skilað sér til talningar, að því er fram kemur í Morgunblaðinu í dag.