Undanfarin tvö ár hefur orðið vart við rottur í efri byggðum höfuðborgarsvæðisins, það er í Breiðholti og Árbæ.
Þetta segir Guðmundur Björnsson, rekstrarstjóri meindýravarna Reykjavíkurborgar, í Morgunblaðinu í dag.
„Lengi vel var þetta þannig að rottur sáust hvorki í Breiðholti né Árbæ. En ætli það séu ekki tvö ár síðan maður fór að heyra af þessu. Þá voru bilaðar lagnir uppi í Árbæ og líka í Neðra-Breiðholtinu, og menn voru að mynda lagnirnar, og þá sáu þeir í dýr,“ segir Guðmundur. Ástand lagna skiptir máli í þessu sambandi. Séu þær í lagi verði menn ekki varir við meindýrin.