Nýjasta höfuðgæs Blönduósbúa, grágæsin Blanda, hefur fengið sinn eiginn gervihnattarsendi svo hægt verður að fylgjast með ferðum hennar næstu tvö árin.
Hún var merkt ásamt 112 öðrum gæsum á Einarsnesi við Blöndu í gær með bókstafnum B, en 16 ár eru síðan gæsir voru merktar síðast á Blönduósi. Ein gæs úr þeim hópi skilar sér enn á heimaslóðir og skilar jafnvel enn ungum.
Jón Sigurðsson birtir mynd af eðalgæsinni Blöndu og gæsasérfræðingnum Arnóri Þóri Sigfússyni á Facebook-síðu sinni í gærkvöld.