Bjarni Benediktsson, fjármála- og efnahagsmálaráðherra, segir að náist samkomulag um SALEK, hafi verið skapaðar alvöru forsendur fyrir vaxtalækkun.
Bjarni segir í samtali í Morgunblaðinu í dag, að haldi sveitarfélögin og ríkið aftur af eyðslu sinni, og laun í landinu verði ekki hækkuð umfram framleiðnivöxt, muni vextir lækka.
Fjármálaráðherra segir að gögn frá norskum hagfræðingi, sem sé sérfræðingur í vinnumarkaðsmálum, hafi verið lögð fyrir SALEK-hópinn, þar sem nákvæmlega komi fram hvernig launaþróun í Skandinavíu hafi verið, hvernig vextir hafi þróast og hvernig launabreytingar opinberra starfsmanna hafi verið, samanborið við almenna markaðinn. „Þessi lönd búa bara við allt annan veruleika en við,“ segir Bjarni.