Evrópusamtök hægri flokka, AECR, hafa sett af stað ferli sem gæti leitt til brottreksturs Réttlætis- og þróunarflokks Tyrklands, AK. Guðlaugur Þór Þórðarson, þingmaður Sjálfstæðisflokksins, er varaformaður AECR og var hann á meðal þeirra sem áttu frumkvæði að brottrekstri Tyrkja úr samtökunum.
Endanleg ákvörðun um brottrekstur flokka úr samtökunum er í höndum AECR-ráðsins sem kemur saman tvisvar á ári.
Í samtali við mbl.is segir Guðlaugur að stjórn AECR hafi ákveðið að senda sendinefnd til Tyrklands í haust til að ræða við fulltrúa AK-flokksins. Er það fyrsta skrefið í ferlinu sem leiðir til brottreksturs flokksins úr samtökunum en Recep Tayyip Erdogan Tyrklandsforseti kemur úr röðum AK-flokksins.
Evrópusamtökin voru stofnuð að frumkvæði breska Íhaldsflokksins og fleiri hægriflokka árið 2009 og gekk Sjálfstæðisflokkurinn í samtökin árið 2011. Árið 2013 gekk AK-flokkurinn í samtökin.
Frétt mbl.is: Ákvörðun AKP „ákaflega vitlaus“
Guðlaugur Þór segir AECR hafa ákveðið að stíga skrefið vegna þróunarinnar í Tyrklandi á undanförnum árum og var tillagan samþykkt í stjórn AECR í sumar áður en valdaránstilraunin hófst.
„Það hefur verið brotið gegn lýðræðislegum stjórnarháttum og á mannréttindum borgara landsins en það stríðir gegn grunngildum AECR,“ segir Guðlaugur Þór og bendir á að grunngildin séu mannréttindi, lýðræði, einstaklingsfrelsi, þingræði og virðing fyrir fullveldi þjóðríkja.
Guðlaugur segir að þegar AK-flokkurinn gekk í samtökin árið 2013 hafi flokkurinn verið allt annar en sá sem við sjáum og heldur um stjórnartaumana í Tyrklandi í dag.