IKEA hefur bætt sex súkkulaðitegundum við yfirstandandi innköllun, sem teljast ekki æskilegar þeim sem þjást af ofnæmi eða eru viðkvæmir fyrir heslihnetum og/eða möndlum.
Frétt mbl.is: IKEA innkallar dökkt súkkulaði
IKEA vekur athygli viðskiptavina, sem keypt hafa eina eða fleiri af þessum IKEA-súkkulaðitegundum, á að ekki sé æskilegt að einstaklingar sem þjást af ofnæmi eða eru viðkvæmir fyrir heslihnetum og/eða möndlum neyti þeirra.
Súkkulaðitegundirnar sem nú eru innkallaðar eru eftirfarandi:
CHOKLAD LINGON & BLÅBÄR 180 g (súkkulaði með týtu-/bláberjabragði)
CHOKLAD LJUS UTZ 100 g (mjólkursúkkulaði)
CHOKLAD NÖT UTZ 100 g (mjólkursúkkulaði með heslihnetum)
GODIS CHOKLADKROKANT 450 g (mjólkursúkkulaði með karamellu)
GODIS CHOKLADRÅN 168 g (súkkulaði með kremkexfyllingu)
CHOKLADKROKANT BREDBAR 400 g (með súkkulaði- og karamellubragði).
Innköllunin nær til allra dagsetninga sem umbúðirnar eru stimplaðar með.
Í mörgum tilfellum hafa fundist heslihnetur og möndlur í vörunum, sem undirstrikar það að einstaklingar sem þjást af ofnæmi eða eru viðkvæmir fyrir þessum ofnæmisvöldum ættu ekki að neyta þeirra, segir í tilkynningu IKEA.
Vöruupplýsingarnar gefa ekki nægilega skýra mynd af því hversu algengt er að ofnæmisvaldurinn finnist í vörunum, þar sem aðeins kemur fram „gæti innihaldið …“. Vöruupplýsingarnar gætu þar af leiðandi verið misvísandi og þess vegna ekki túlkaðar í samræmi við lög á einhverjum markaðssvæðum. Í samræmi við gæða- og öryggiskröfur IKEA var því ákveðið að kalla inn vörur á heimsvísu sem þetta á við um, burtséð frá mismunandi löggjöf á markaðsvæðum IKEA.
Vörurnar eru öruggar þeim sem ekki þjást af ofnæmi eða eru viðkvæmir fyrir möndlum og/eða heslihnetum. IKEA hefur ekki borist tilkynning um atvik í tengslum við vörurnar sex sem bættust við yfirstandandi innköllun á súkkulaði.
Viðskiptavinum er velkomið að skila þeim vörum sem hér um ræðir í versluninni og fá þær endurgreiddar að fullu.
Nánari upplýsingar eru veittar í þjónustuveri í síma 520-2500 og á www.IKEA.is.