Sigurður Einarsson, fyrrverandi stjórnarformaður Kaupþings, hefur áfrýjað til Hæstaréttar Íslands sýknudómi í máli hans gegn íslenska ríkinu vegna skattlagningar á kaupréttum hans í störfum sínum hjá bankanum á árunum 2006 til 2008.
Héraðsdómur Reykjavíkur sýknaði í maímánuði ríkið af kröfum Sigurðar, en hann krafðist þess að úrskurðum ríkisskattstjóra og yfirskattanefndar, þar sem endurákvörðuð voru gjöld Sigurðar gjaldárin 2007, 2008 og 2009, yrði hnekkt.
Sigurður taldi að kaupréttirnir sem hann nýtti sér hefðu verið skattskyldir í Bretlandi þar sem hann var búsettur og hann hefði þegar greitt það sem honum ber þar í landi. Íslensk skattayfirvöld féllust hins vegar ekki á það.
Var með öðrum orðum deilt um hvort skattleggja bæri tekjur af kauprétti á hlutabréfum í bankanum sem Sigurður fékk sem stjórnarlaun samkvæmt 16. gr. tvísköttunarsamnings milli Íslands og Bretlands eða sem almenn laun samkvæmt 15. gr. tilvitnaðs samnings.
Héraðsdómur komst að þeirri niðurstöðu að kaupréttur Sigurðar hefði verið hluti af kjörum hans sem stjórnarmanns í Kaupþingi banka. Það var því niðurstaða dómsins að tekjur Sigurðar vegna kaupréttar hans á hlutabréfum í Kaupþingi hf. væru skattskyldar á Íslandi.
Sigurður krafðist ógildingar á úrskurði ríkisskattstjóra og úrskurði yfirskattanefndar, en með úrskurði nefndarinnar var staðfest sú niðurstaða ríkisskattstjóra að færa Sigurði til tekna sem stjórnarlaun 673.960.000 krónur tekjuárið 2006, 599.256.000 krónur tekjuárið 2007 og 328.048.000 krónur tekjuárið 2008, vegna kaupa hans á hlutabréfum í Kaupþingi, auk 25% álags.
Frétt mbl.is: Tekjur Sigurðar skattskyldar á Íslandi