Engar nýjar vísbendingar hafa komið fram í rannsókn á morði á Íslendingi í Akalla-hverfinu í Stokkhólmi, að sögn lögreglunnar. Einn er í gæsluvarðhaldi vegna málsins og annars er leitað. Lögreglan hefur vísbendingar hver sá maður er en hefur ekki haft upp á honum.
Towe Hägg, sem stýrir rannsókninni hjá lögreglunni í Stokkhólmi, segir í samtali við mbl.is að maðurinn sem er í haldi lögreglu verði áfram í haldi og að rannsókn sé enn í fullum gangi.
35 ára gamall Íslendingur var myrtur á tjaldstæði í Akalla-hverfinu þann 18. júlí sl. Maðurinn fannst alblóðugur á tjaldstæðinu og lést síðar þann sama dag á sjúkrahúsi í borginni.
Karlmaðurinn sem handtekinn var og úrskurðaður í gæsluvarðhald, grunaður um aðild að morðinu á Íslendingi í Stokkhólmi, heldur fram sakleysi sínu. Þetta segir lögmaður mannsins í samtali við sænska dagblaðið Expressen.
Maðurinn sem er í haldi lögreglu neitar því að hafa komið að morðinu en hann er sagður hafa komið áður við sögu hjá lögreglunni.
Haft var eftir vitni að mennirnir hefðu rifist um dulkóðuð tölvugögn í aðdraganda árásarinnar, en lögreglan í Stokkhólmi hefur ekki viljað tjá sig um þær upplýsingar.
Frétt mbl.is: Skilur af hverju hann var handtekinn