Maðurinn sem króaði sérsveitarmann af fyrr í vikunni, reyndi ítrekað að stinga hann með hnífi og hótaði honum lífláti var handtekinn og yfirheyrður vegna málsins. Var honum sleppt að loknum yfirheyrslum þar sem málið var metið þannig að ekki væri ástæða til þess að óska eftir gæsluvarðhaldi yfir honum.
Þetta segir Ólafur Þór Hauksson héraðssaksóknari í samtali við mbl.is. Aðspurður segist hann ekki vilja tjá sig frekar um málið eða hvað réði úrslitum í þeirri ákvörðun að sleppa manninum lausum, að fara ekki fram á gæsluvarðhald. Héraðssaksóknari er með málið til rannsóknar þar sem um er að ræða brot gegn lögreglumanni.
Snorri Magnússon, formaður Landssambands lögreglumanna, sagði í samtali við mbl.is í morgun að lögreglumenn væru reiðir yfir því að líf þeirra væri metið á þennan hátt. „Það virðist engu máli skipta þó að það sé verið að ráðast á þá, stinga og hóta lífláti,“ sagði hann meðal annars.
Tveir sérsveitarmenn fóru í útkall í íbúðarhús á höfuðborgarsvæðinu á þriðjudagskvöld. Voru þeir næstir húsinu af þeim lögreglumönnum sem voru á vakt og sinntu þeir því útkallinu.Þeir knúðu dyra og tók maður á móti þeim vopnaður hnífi. Tókst manninum að læsa annan sérsveitarmanninn úti og reyndi ítrekað að stinga sérsveitarmanninn sem er inni í íbúðinni. Hótaði maðurinn honum jafnframt lífláti.
Frétt mbl.is: Reyndi ítrekað að stinga sérsveitarmann