Mennta- og menningarmálaráðherra hyggst ganga til samninga við Háskólann á Akureyri vegna kennslu- og rannsóknarstarfsemi á sviði lögreglufræða. Þetta kemur fram á vef ráðuneytisins.
Ríkiskaup auglýstu val á framkvæmdaraðila og héldu utan um matsferlið. Fjórir aðilar skiluðu inn gögnum: Háskóli Íslands, Háskólinn á Akureyri, Háskólinn á Bifröst og Háskólinn í Reykjavík.
Umsókn Háskólans á Bifröst uppfyllti ekki hæfiskröfu um viðurkenningu til kennslu í sálfræði.
Matsnefnd fór yfir innsend gögn. Innbyrðis skipting stigafjölda þeirra umsækjenda sem uppfylltu lágmarksskilyrði var eftirfarandi:
„Ráðherra hefur ákveðið að ganga til samninga við Háskólann á Akureyri um kennslu- og rannsóknarstarfsemi á sviði lögreglufræða í samræmi við ákvæði 21. gr. laga um háskóla.
Að mati ráðherra uppfyllti Háskólinn á Akureyri mjög vel þær kröfur sem gerðar eru um gæði náms og aðbúnað til lögreglumenntunar. Þá telur ráðherra aðstæður við HA til þess fallnar að gera nemendum af landinu öllu kleift að leggja stund á lögreglunám. Að auki er með þessari ákvörðun skotið styrkari stoðum undir fjölbreytta starfsemi Háskólans á Akureyri,“ segir í tilkynningunni á vef mennta- og menningarmálaráðuneytisins.