Alls voru um 300 sektaðir fyrir stöðubrot á höfuðborgarsvæðinu á Menningarnótt. Þetta kemur fram á Facebook-síðu lögreglunnar.
Umferðin á Menningarnótt gekk vel en hægt á köflum og má þar sérstaklega nefna Vatnsmýrarveg og Hringbraut.
Á sama tíma var minna álag á Sæbraut og nóg af bílastæðum í Borgartúni og nágrenni þess.
„Sem fyrr áttu sumir ökumenn erfitt með að virða lokanir, en það jákvæða á Menningarnótt var hins vegar sú staðreynd að stöðubrotum snarfækkaði frá fyrri árum. Þau voru nú um 300 sem telst í minna lagi enda hafa stöðubrot á Menningarnótt að jafnaði verið um eitt þúsund og rúmlega það,“ segir í færslu lögreglunnar á Facebook.