Kvörtunum til umboðsmanns Alþingis fækkaði um 11% árið 2015 frá 2014 samkvæmt því sem fram kemur í skýrslu frá embættinu.
Á árinu 2015 voru 450 mál afgreidd en þau voru 558 árið áður. Er þetta sagt þriðja árið í röð þar sem afgreidd mál eru fleiri en þau sem berast, að því er fram kemur í Morgunblaðinu í dag.
Flest málin koma inn á borð vegna tafa hjá stjórnvöldum, eða 20%, en það er svipað og verið hefur undanfarin ár. Aðrir málaflokkar tengjast m.a. opinberum starfsmönnum (11%), almannatryggingum (7%), fjármála- og tryggingastarfsemi (5%) og sköttum og gjöldum (5%).