Embætti umboðsmanns skuldara hefur nú lokið rétt rúmlega þrjú þúsund samningum um greiðsluaðlögun frá því það var stofnað í ágúst árið 2010.
Áætla má að eftirgjöf óveðtryggðra krafna nemi um 23,5 milljörðum á þessum sex árum. Umsóknum hjá umboðsmanni skuldara hefur fjölgað það sem af er ári, eftir að hafa fækkað síðustu ár.
„Við höfum orðið vör við fjölgun umsækjenda sem búa í leiguhúsnæði og þá hefur fjölgað í hópi umsækjenda á aldrinum 18 til 39 ára. Húsnæðiskostnaður er að sliga fólk, hvort sem það eru greiðslur leigu eða af veðskuldum,“ segir Ásta Sigrún Helgadóttir, umboðsmaður skuldara, í umfjöllun um mál þetta í Morgunblaðinu í dag.