Ekki verður farið fram á gæsluvarðhald yfir skipverjanum sem hótaði að beita skotvopni um borð í erlendri skútu við bryggjuna á Suðureyri. Samkvæmt upplýsingum frá lögreglunni á Vestfjörðum var ekki talið tilefni til frekari rannsókna og telst málinu lokið.
Frétt mbl.is: Hótaði að beita skotvopni
Lagt var hald á þrjú skotvopn sem voru um borð í skútunni og þau afhent tollgæslu, en að sögn lögreglu var um að ræða bæði „venjuleg og öflug skotvopn“. Manninum var gert að greiða sekt á grundvelli vopnalaga og fyrir brot á lögum er snúa að tilkynningarskyldu skipa til vaktstöðvar siglinga.
Mennirnir þrír sem voru um borð í skútunni voru að sögn lögreglu erlendir menn á ferðalagi, en einn þeirra taldi ástæðu til að ætla að skipstjórinn myndi grípa til vopna vegna ágreinings um borð í skútunni og tilkynnti lögreglu. Skútan var tollafgreidd í gær og er hún því farin frá landinu.
Frétt mbl.is: Lögðu hald á þrjú skotvopn í skútunni