Ýmsar orsakir fyrir að neyðarsendir fer í gang

Áhafn­ir TF-SYN og TF-SIF voru kallaðar út er neyðarboðin bárust.
Áhafn­ir TF-SYN og TF-SIF voru kallaðar út er neyðarboðin bárust. Árni Sæberg

Ókyrrð, harkaleg lending eða mannleg mistök kunna að vera ástæður þess að neyðarsendir fór í gang í íslenskri flugvél sem var á leið til lendingar í Skagafirði í gær, með þeim afleiðingum að mik­ill viðbúnaður var virkjaður í stjórn­stöð Land­helg­is­gæsl­unn­ar.

Þetta segir Ásgrímur L. Ásgrímsson, framkvæmdastjóri aðgerðasviðs Landhelgisgæslunnar, og kveður atvikið hafa verið tilkynnt Rannsóknarnefnd samgönguslysa sem skoði það frekar.

Flugvélar, skip og björgunarbátar í flugvélum og skipum eru með svo kallaða COSPAS-SARSAT-neyðarsenda, sem er alþjóðlegt neyðarsendakerfi. „Það þarf ekki annað en að vélin lendi í ókyrrð og þá geta neyðarsendarnir farið í gang, sömuleiðis við harkalega lendingu eða ef menn reka sig óvart í þá í flugstjórnarklefanum,“ segir Ásgrímur og kveðst þeirrar skoðunar að eitthvað af þessu hafi gerst.

Ekki óeðlilegt að ekki hafi náðst í flugmanninn

Sam­hæf­ing­ar­stöðin í Skóg­ar­hlíð var virkjuð, björg­un­ar­sveit­ir kallaðar út og sömu­leiðis áhafn­ir TF-SYN og TF-SIF eftir að neyðarboð hófu að ber­ast um klukk­an 16.30 í gær. Þá hafði Landhelgisgæslan sam­band við flug­stjórn­ar­miðstöð, sem upp­lýsti að viðkom­andi flug­vél væri á flugi yfir Íslandi og áætlaði lend­ingu í Skagaf­irði tveim­ur og hálf­um tíma síðar.

Ásgrímur segir að reynt hafi verið að hafa samband við flugvélina og síma flugmannsins þegar vitað var hver var þar á ferð, en ekki náðist samband við hann. „Það er hins vegar ekkert óeðlilegt við að ekki hafi náðst samband við flugmanninn, því ekki þarf annað til en að hann sé að fljúga inni í dal og sé því sambandslaus,“ segir hann.

„Það er ekkert hægt að gera annað en að bregðast við þessu og þegar það náðist samband við flugmanninn innan við klukkutíma áður en allt fór af stað þá voru menn bara fegnir að allt var í sóma.“

120-130 tilkynningar á ári

Ásgrímur segir neyðarsendi fara í gang um 120-130 sinnum á ári inni á leitar- og björgunarsvæði Íslands. „Sem betur fer er það síðan kannski ekki nema einu sinni á ári sem raunverulegrar björgunar er þörf. Oftast eru það harkalegar lendingar, skip að fá á sig brotsjó eða annað slíkt sem veldur því að neyðarsendirinn fer í gang,“ segir hann og bætir við að allar slíkar tilkynningar séu þó rannsakaðar.

Fyrir um áratug, áður en COSPAS-SARSAT-kerfið var endurnýjað skiptu tilkynningarnar hins vegar hundruðum og því hefur verulega dregið úr tilkynningum neyðarsenda með nýja kerfinu.  

Viðbúnaður vegna neyðarboða frá flugvél

mbl.is

Bloggað um fréttina

Fleira áhugavert
Fleira áhugavert