Trúarágreiningur nærður með lögum

Helgi Hrafn Gunnarsson, þingmaður Pírata.
Helgi Hrafn Gunnarsson, þingmaður Pírata. mbl.is/Styrmir Kári

„Við hreinlega verðum að aðskilja ríki og kirkju upp á framtíðina. Við verðum að gera það. Ekki vegna þess að kristin trú eða trúarbrögð þjóðkirkjunnar séu svona eða hinsegin heldur vegna þess að þetta er lýðveldi. Hér á að ríkja jafnræði fyrir lögum án tillits til trúarskoðana. Það er lýðræði,“ sagði Helgi Hrafn Gunnarsson, þingmaður Pírata, á Alþingi í dag í umræðum um störf þingsins. Stjórnmál og trúarbrögð ættu ekki samleið.

„Það er ekki eðlilegt að íslenska ríkið sé með sérstök trúarbrögð og sérstaka trúarstofnun sem ríkið ætlar að vernda og styrkja og styðja sérstaklega. Það er ekki eðlilegt fyrirkomulag þar sem jafnræði fyrir lögum er raunverulega virt. Ekki bara eftir úrskurðum Hæstaréttar heldur raunverulega út frá gildi lýðræðissinna. Þetta er mikilvægt,“ sagði Helgi. Hann sagði að trúarlegur ágreiningur ætti sér stað í samfélaginu, sem meðal annars væri afleiðing ákvæða í lögum þar sem sveitarfélögum væri skylt að gefa trúfélögum lóðir undir tilbeiðsluhús.

„Út frá því verður ágreiningur um hvort það eigi við líka um moskur. Út frá því verður ágreiningur um túlkun 62. greinar stjórnarskrárinnar, nefnilega ríkiskirkjuákvæðisins, og í kjölfarið ágreiningur um túlkun 65. greinar stjórnarskrárinnar um jafnræði og sömuleiðis almenn jafnræðissjónarmið. Mér þykir algjörlega ótækt að sá hryllingur sem getur átt sér stað vegna trúarlegs ágreinings fái næringu úr íslenskum lögum og íslenskri stjórnarskrá.“

mbl.is
Fleira áhugavert
Fleira áhugavert