Hvorki Embætti landlæknis né Siðfræðistofnun Háskóla Íslands kannast við að hafa verið beðin um álit frá stjórnskipunar- og eftirlitsnefnd Alþingis vegna tengsla Landspítalans við mál ítalska skurðlæknisins Paolo Macchiarini.
Ögmundur Jónasson, formaður nefndarinnar, sagði í samtali við mbl.is á þriðjudag að óskað hefði verið eftir áliti frá fyrrnefndum stofnunum vegna málsins.
Frétt mbl.is: Óska eftir áliti vegna máls Macchiarini
Macchiarini framkvæmdi skurðaðgerð þar sem plastbarki var græddur í Andemariam Teklesenbet Beyene árið 2011. Maðurinn sem um ræðir var búsettur hér á landi. Hann leitaði sér lækninga á Landspítalanum en í ljós kom að hann var með krabbamein í hálsi. Var ákveðið að senda hann til Svíþjóðar þar sem græddur var í hann plastbarki. Maðurinn lét síðar lífið. Grein um aðgerðina var birt í læknatímaritinu Lancet. Tveir íslenskir læknar eru á meðal þeirra 27 lækna sem koma að greininni.
Sænsk rannsókn hefur nú leitt í ljós að stjórn Karólínska stofnunarinnar hefði sýnt vanrækslu er hún réði skurðlækninn Paolo Macchiarini til starfa og leyfði honum að gera aðgerðir á sjúklingum. Macchiarini var rekinn í mars síðastliðinn.
Í svari frá Embætti landslæknis kemur fram að ekki hafi borist nein formleg beiðni um álit eða rannsókn á tengslum Landspítala eða Háskóla Íslands við plastbarkaígræðsluna. Vilhjálmur Árnason, stjórnarformaður Siðfræðistofnunar segir í samtali við mbl.is að stofnuninni hafi ekki borist formleg beiðni um álitsgjöf.
Siðfræðistofnun sendi heilbrigðisráðherra bréf í vor þar sem kemur fram að stofnunin telji plastbarkamálið eitt alvarlegasta siðferðisslys í heilbrigðisþjónustu á Norðurlöndunum. Stofnunin hvetur til íslenskrar rannsóknar á málinu.
Frétt mbl.is: Fékk rétta greiningu og tilvísun
Á mánudag leystu sænsk stjórnvöld stjórn Karólínsku stofnunarinnar í Svíþjóð frá störfum eftir að rannsókn leiddi í ljós að hún hefði sýnt vanrækslu er hún réð skurðlækninn Paolo Macchiarini til starfa og leyfði honum að gera aðgerðir á sjúklingum. Þá hafa tveir fyrrverandi rektorar við Karólínska háskólann í Stokkhólmi verið reknir úr sænsku nóbelsnefndinni vegna tengsla þeirra við málið. Í svari Embætti landlæknis segir að nýjustu upplýsingar um Karolinska háskólann breyti engu varðandi þörf á rannsókn á málinu á Íslandi.