Páfagaukurinn sem flaug inn í flugskýli Reykjavík Helicopters er kominn til síns heima í Skerjafirði eftir að eigandinn hafði samband við fyrirtækið seinnipartinn í gær.
Frétt mbl.is: Kannast þú við gaukinn?
„Máttur Facebook er ótrúlegur,“ segir Friðgeir Guðjónsson, framkvæmdastjóri Reykjavík Helicopters, ánægður með niðurstöðu málsins.
Hann segir að í raun hafi tveir páfagaukar sloppið frá eigandanum. Hinn fannst á leikskóla í Skerjafirði og var hann einnig á lífi.
Friðgeir greinir frá því að páfagaukurinn sem heimsótti þá á Reykjavíkurflugvöll á miðvikudagskvöld hafi verið horfinn þegar þeir mættu aftur aftur til vinnu í gærmorgun. „Við vorum í pínulitlu áfalli. Svo virðist sem hann hafi náð að stinga sér undir pínulítið gat á hurðinni,“ segir hann.
Gaukurinn fannst aftur seint um kvöldið á vinnusvæði í Vestuvör í Kópavogi. Þangað hafði hann flogið langa leið í slæmu veðri. „Þetta er súperfugl,“ segir Friðgeir og hlær.
Starfsmaður þar hafði fundið hann og komið með heim. Konan hans hringdi þá í Reykjavík Helicopters og lét Friðgeir og félaga vita. Skömmu síðar hafði eigandi páfagauksins samband við þá og spurði um fuglinn sinn og fékk að vita að hann væri heill á húfi.
Aðspurður kveðst Friðgeir hafa gefið fuglinum nafnið Mr. Pitts. Ekki samt í höfuðið á leikaranum Brad Pitt, sem er mikið í umræðunni þessa dagana, heldur á flugvélategundinni Pitts Special sem er tvívængja og iðulega notuð í listflugi.