Almennar stjórnmálaumræður sem oftast kallast eldhúsdagsumræður á Alþingi hefjast núna klukkan 19:40 og standa fram eftir kvöldi. Umræðurnar skiptast í þrjár umferðir og hefur hver þingflokkur 10 mínútur í fyrstu umferð en svo 6 mínútur í annarri og þriðju umferð.
Röð flokkanna verður eftirfarandi í öllum umferðum: Samfylkingin, Sjálfstæðisflokkur, Vinstri hreyfingin – grænt framboð, Framsóknarflokkur, Björt framtíð og Píratar.
Formenn flestra flokka taka til máls í fyrstu umferð, en Framsóknarflokkurinn er þar undantekning. Mun Lilja Dögg Alfreðsdóttir utanríkisráðherra flytja fyrstu ræðu flokksins í kvöld, en Sigurður Ingi Jóhannsson forsætisráðherra og Sigmundur Davíð Gunnlaugsson formaður flokksins munu hvorugur halda ræðu í kvöld.
Ræðumenn verða eftirfarandi í kvöld:
Samfylkingin: Oddný G. Harðardóttir, Sigríður Ingibjörg Ingadóttir og Árni Páll Árnason.
Sjálfstæðisflokkurinn: Bjarni Benediktsson fjármálaráðherra, Ólöf Nordal innanríkisráðherra og Haraldur Benediktsson.
Vinstri hreyfingin – grænt framboð: Katrín Jakobsdóttir, Svandís Svavarsdóttir og Bjarkey Olsen Gunnarsdóttir.
Framsóknarflokkur: Lilja Dögg Alfreðsdóttir utanríkisráðherra, Eygló Harðardóttir, félags- og húsnæðismálaráðherra, og Karl Garðarsson.
Björt Framtíð: Óttarr Proppé, Björt Ólafsdóttir og Páll Valur Björnsson.
Píratar: Birgitta Jónsdóttir, Ásta Guðrún Helgadóttir og Helgi Hrafn Gunnarsson.
Mbl.is mun fylgjast með umræðunum, en einnig verður hægt að horfa á þær í beinni útsendingu á vef Alþingis og á RÚV.