Hæstu tré sem vaxa á Vestfjarðakjálkanum nálgast nú tuttugu metra hæð og má búast við að þeirri hæð verði náð á næsta ári.
Nánast hnífjafnt er nú í kapphlaupi alaskaaspar í Dýrafirði og sitkagrenis í Reykhólasveit, segir á vef Skógræktarinnar.
Myndarleg alaskaösp við Miðbæ í Haukadal í Dýrafirði mældist 19,7 metrar og hefur hækkað um 140 sentímetra á tveimur sumrum. Sitkagrenitré í Barmahlíð í Reykhólasveit mældist nú 19,6 m og hefur bætt við sig 60 cm síðustu tvö sumur.