Ríkisráð Íslands hefur verið kvatt saman til fundar á Bessastöðum á morgun klukkan 14. Er það fyrsti ríkisráðsfundur Guðna Th. Jóhannessonar, sem var kjörinn forseti í sumar.
Ráðherrar funda með forseta á ríkisráðsfundum en efni fundarins á morgun er hefðbundið, samkvæmt upplýsingum frá Ágústi Geir Ágústssyni, skrifstofustjóra í forsætisráðuneytinu.
Ráðið mun á morgun endurstaðfesta öll lögin sem Alþingi samþykkti á haustþinginu. Ríkisráðfundir eru haldnir við lok löggjafarþings og á gamlársdag.