„Þetta er eins og gengur, stundum tefjast mál en þetta klárast fyrir helgina,“ segir Gunnar Bragi Sveinsson, sjávarútvegs- og landbúnaðarráðherra, í samtali við mbl.is. Í fyrradag rann út frestur sem Alþingi veitti ráðherra til að skipa samráðshóp um endurskoðun búvörusamninga.
Gunnar sagði málið ekki hafa gleymst en ýmsar ástæður hafi verið fyrir því að ekki tókst að klára það á tilsettum tíma. Búið hafi verið að skipa formann en sá hafi gengið úr skaftinu.
„Því miður náðist ekki að klára þetta. Það eru ýmsar ástæður fyrir því sem í sjálfu sér skipta engu máli. Þetta tafðist en við klárum þetta fyrir helgina, á morgun. Þá sendum við út tilnefningarbréfin.“
Í lögum um breytingar á búvörulögum og fleiri lögum vegna búvörusamninganna, sem Alþingi samþykkti 13. september síðastliðinn, segir í bráðabirgðaákvæði: „Eigi síðar en 18. október 2016 skal sjávarútvegs- og landbúnaðarráðherra skipa samráðshóp um endurskoðun búvörusamninga. Tryggja skal aðkomu afurðastöðva, atvinnulífs, bænda, launþega og neytenda að endurskoðuninni og skal henni lokið eigi síðar en árið 2019.“
Félag atvinnurekenda undraðist í gær seinaganginn. „Við höfum ekkert heyrt. Okkur og fleirum vorum gefin fyrirheit um að við yrðum í þessum hópi. Maður hefði haldið að við ættum að fá bréf og eða ráðuneytið ætti að vera búið að gefa eitthvað út um þetta,“ segir Ólafur Stephensen, framkvæmdastjóri Félags atvinnurekenda, í samtali við mbl.is í gær.