Enn er allt á huldu með framtíð St. Jósefsspítala

Haraldur L. Haraldsson, bæjarstjóri Hafnarfjarðarbæjar, segir að bærinn og ríkið eigi áfram í viðræðum um það hver framtíð St. Jósefsspítala verði.

Bærinn hefur hug á því að húsið verði að fullu á forræði Hafnarfjarðarbæjar. Ríkið á 85% í húsinu og Hafnarfjarðarbær á 15%.

„Á þessu stigi sjáum við ekki fyrir hver niðurstaða viðræðnanna verður eða hvenær hún fæst. Þetta hefur tekið langan tíma og það sem deilt er um í þessum viðræðum er vitanlega peningar, þ.e. hversu mikils virði húsið er,“ sagði Haraldur í samtali við Morgunblaðið í gær.