Karlmaður á þrítugsaldri hefur verið sakfelldur fyrir að nauðga sautján ára stúlku, sem ekki gat spornað við verknaðinum vegna ölvunar og svefndrunga. Staðfestir Hæstiréttur dóm Héraðsdóms Reykjaness, þar sem maðurinn hafði verið dæmdur í fangelsi til tveggja ára.

Þá er honum gert að greiða stúlkunni 1.000.000 krónur í miskabætur, hún hafði i dómskröfu fyrir héraðsdómi óskað eftir tveimur milljónum króna.

Fram kemur í dómnum að stúlkan var ásamt fleirum í heimahúsi vinar, í apríl árið 2014, þegar hún veiktist og kastaði upp. Bróðir hennar hafi þá borið hana inn í svefnherbergi og upp í rúm, þar sem hann breiddi yfir hana sæng.

Ekki raunveruleiki heldur martröð

Er bróðirinn einnig sagður hafa sagt við ákærða að láta hana í friði, en hann hafi þó komið ítrekað inn í herbergið og spurt hana hvort hún vildi ekki koma fram.

„Brotaþoli kveðst hafa sofnað, en vaknað við það að einhver hafi haldið utan um hana aftan frá. Þegar hún vaknaði hafi hún þurft að kasta upp. Hún hafi í fyrstu ekki vitað hver hafi haldið utan um hana en komist að því síðar að það var ákærði. Hann hafi farið að strjúka henni um magann, en hún hafi sagt honum að hætta,“ segir í bréfi sem barnaverndarnefnd sendi lögreglu.

„Hann hafi þá spurt hvort hún væri alveg viss og hafi hún svarað því játandi. Brotaþoli kveðst ekki muna mikið meira því að hún hafi dottið út og það næsta sem hún viti er að ákærði sé ofan á henni og sé að hrista á henni hausinn og nauðga henni.“

Haft er eftir brotaþola í bréfinu að hún hafi í fyrstu haldið að þetta væri ekki raunveruleiki heldur martröð.

Ekki „virkað“ fyrr en næsta kvöld

Er þess getið í dómnum að hún hafi greint frá atvikum með sama hætti fyrir barnaverndarnefnd, hjá lögreglu og fyrir dómi „og verið einlæg og trúverðug í mjög ítarlegri frásögn sinni af atvikum, þar á meðal því að ákærði hefði verið með getnaðarlim sinn í leggöngum hennar þegar hún vaknaði.“

Fram kemur einnig að ákærði hafi neitað því aðspurður að hann hefði verið með getnaðarliminn í leggöngum brotaþola þegar hún hafi vaknað „og sagði það ekki vera rétt því að hann hefði ekki náð honum upp. Hann hafi ekki „virkað“ fyrr en næsta kvöld.“

Maðurinn, sem fæddur er árið 1992, var dæmdur í tveggja ára fangelsi eins og áður sagði. Í ljósi alvarleika brotsins eru sögð engin efni til að binda refsingu hans skilorði.

Tengdar fréttir

Kynferðisbrot

Landsréttur mildar þriggja ára nauðgunardóm

• Þriggja ára nauðgunardómur staðfestur
• Sýknuð af ákæru um að ljúga til um nauðgun
• Dómur vegna kynferðisbrota árið 2017 óraskaður
• Fær ekki að áfrýja dómi í kynferðisbrotamáli

» Fleiri tengdar fréttir

• Blogga um frétt