Starfið bara fyrir Íslendinga

Dæmi eru um að vel menntaðir innflytjendur, sem jafnvel hafa gengið í íslenska háskóla, þurfi að villa á sér heimildir til að eiga möguleika á atvinnuviðtali, frá þessu var greint í fréttum Stöðvar 2 í kvöld.

Stöð 2 ræddi við héraðsdómslögmann af erlendum uppruna, sem er með íslenska háskólagráðu. Hann sótti um vinnu hjá fyrirtæki í Reykjavík, en fékk þau svör hjá ráðningarskrifstofunni að starfið væri bara fyrir Íslendinga.

Davor Purusic flutti til Íslands frá Sarajevó fyrir rúmum tveimur áratugum og er héraðsdómslögmaður með íslenska háskólagráðu. „Ég lenti á sínum tíma meðal annars í því þegar ég sótti um starf hjá opinberri stofnun, sem var auglýst í gegnum ráðningarstofu niðri í bæ, að ég fékk ekki einu sinni viðtal,“ sagði Davor.

Ráðningarstofan lét stofnunina sem um ræðir aldrei hafa umsókn Davors. Hann ákvað því að koma umsókninni áleiðis milliliðalaust. „Ég fór í viðtal og endaði á að vinna fyrir þessa stofnun í þrjú og hálft ár,“ segir Davor.

Hann segist þekkja dæmi um einstaklinga sem hafi lagt inn atvinnuumsókn með bæði íslensku nafni og erlendu og í þeim tilfellum hafi íslenska umsóknin komist mun lengra.

Málþing um mannauð innflytjenda verður haldið á vegum Rauða krossins næsta þriðjudag.

• 1 blogg um fréttina

Bloggað um fréttina

• Eyjólfur Jónsson: Þetta var ekki gott!