Óskað var eftir aðstoð lögreglunnar í heimahús í Hafnarfirði um klukkan 6.45 í morgun þar sem tveir bræður voru að slást.
Annar var handtekinn og vistaður í fangaklefa en hinn var fluttur á slysadeild til frekari skoðunar.
Klukkan rúmlega fimm í nótt var tilkynnt um að bifreið hafi verið ekið á ljósastaur á Hringbraut í Reykjavík. Ökumaður bifreiðarinnar er grunaður um ölvun við akstur og verður hann yfirheyrður síðar í dag.
Um svipað leyti var ökumaður stöðvaður í umdæmi lögreglunnar í Hafnarfirði, Garðabæjar og Álftaness, grunaður um akstur undir áhrifum fíkniefna. Auk þess fundust fíkniefni í bifreiðinni, samkvæmt dagbók lögreglunnar á höfuðborgarsvæðinu.