Fyrsta skóflustungan fyrir nýjum skóla

Fyrsta skóflustungan að nýjum leik- og grunnskóla í Helgafellshverfi í Mosfellsbæ var tekin í dag. Skóflustunguna tóku væntanlegir nemendur skólans sem stunda nú nám í Brúarlandi. Sá skóli er undanfari stofnunar Helgafellsskóla og er rekinn sem útibú frá Varmárskóla. Nemendunum til halds og trausts voru bæjarfulltrúar í Mosfellsbæ.

„Það er stór stund í hverju bæjarfélagi þegar tekin er fyrsta skóflustunga að nýrri skólabyggingu. Skólar eru kjarni samfélagsins og í kringum þá er fjölbreytt og síbreytilegt mannlíf,“ sagði Haraldur Sverrisson, bæjarstjóri Mosfellsbæjar, við þessi tímamót.

„Mosfellsbær leggur áherslu á að hlúa vel að skólastarfi og að hér þrífist framsækið og jákvætt námsumhverfi fyrir börn og starfsfólk. Það mikilvægt fyrir uppbyggingu í Helgafellshverfi að hafin sé framkvæmd leik- og grunnskóla á svæðinu,“ bætti Haraldur við.

Bygging skólans verður stærsta einstaka framkvæmd sveitarfélagsins á næstu misserum. Heildarstærð hússins verður um 7300 fm og áætlaður byggingarkostnaður um 3500 milljónir. Skólinn verður byggður í fjórum áföngum og áætlanir gera ráð fyrir að fyrsti áfangi verði tekin í notkun haustið 2018.

Fullbyggður mun skólinn hýsa um 600 börn á grunnskólaaldri og um 110 börn á leikskólaaldri. Auk þess verður hann vinnustaður um 130 starfsmanna.

Hönnuðir eru Yrki Arkitektar og um jarðvinnu sér Karina ehf. 

Svona mun hluti skólans líta út þegar hann er tilbúinn. Ljósmynd/Mosfellsbær

• Blogga um frétt