Mötuneyti lokað vegna músagangs

Mötuneytið í Rimaskóla í Reykjavík verður lokað næstu daga vegna músagangs. Foreldrum barna við skólann barst tölvupóstur þess efnis fyrr í dag en í samtali við mbl.is segir Helgi Árnason skólastjóri að mötuneytið verði lokað þar til Heilbrigðiseftirlit Reykjavíkur hefur gefið grænt ljós á enduropnun.

„Ég er nú bara búinn að fá þakkarbréf frá foreldrum um að það skuli vera tekið á þessu,“ segir Helgi. „Þetta er eitthvað sem maður vildi taka á strax. Við stöndum hér fyrir fjölmennu mötuneyti og höfum lagt mikla áherslu á að þrif og umgengni sé til fyrirmyndar […] Það var ekkert um annað að ræða.“

Ekki er enn vitað hversu alvarlegt vandamálið er en það verður kannað á næstu dögum.

„Við munum bara gera allt til þess að [laga þetta]. Við fáum meindýraeyði og munum svo þrífa vel og fara í algjöra allsherjar hreingerningu á tækjum, búnaði og húsnæði mötuneytisins. Láta fara yfir hurðir og allt mögulegt. Við þrýstum á að þetta verði vel gert.“

Að sögn Helga eru alltaf einhverjar spenntar músagildrur í mötuneytinu en þær virðast ekki hafa dugað til í þetta skiptið.

„Miðað við stærð eldhússins reiknum við með að þetta gæti staðið út vikuna eða bara þangað til Heilbrigðiseftirlit Reykjavíkur gefur okkur leyfi. Ég kallaði á þá og það eru þeir sem loka eldhúsinu. Það er líka þeirra að gefa okkur leyfi til að opna aftur.“

Helgi Árnason, skólastjóri Rimaskóla

• Blogga um frétt