Ellefu lyklar skiptu um hendur
Setja bókamerki
Ráðherrar nýrrar ríkisstjórnar fengu afhenta lykla að ráðuneytum sínum í dag. Ljósmyndarar mbl.is voru á staðnum til að fanga augnablikin.
Tilkynnt var um ráðherraskipan í gærkvöldi að loknum þingflokksfundum Sjálfstæðisflokksins, Viðreisnar og Bjartrar framtíðar. Sjálfstæðismenn fá sex ráðherra, Viðreisn þrjá og Björt framtíð tvo.
Bjarni Bendediktsson var fyrstur í röðinni. Hann tók við lykli, eða réttara sagt „nútímalykli“, að forsætisráðuneytinu úr höndum Sigurðar Inga Jóhannssonar, formanns Framsóknarflokksins.
Þeir tveir störfuðu saman í síðustu ríkisstjórn en þá var Bjarni fjármálaráðherra. Bjarni sagði að Sigurður Ingi hefði sem forsætisráðherra setið djúpt í hnakkinum eins og góður hestamaður og að hann gæti dregið mikinn lærdóm af honum.
Frétt mbl.is: „Hefur setið djúpt í hnakkinum“
Benedikt Jóhannesson, formaður Viðreisnar, tók skömmu síðar við lyklinum að fjármálaráðuneytinu úr höndum frænda síns Bjarna Benediktssonar.
Í velferðarráðuneytinu afhenti Kristján Þór Júlíusson Óttari Proppé, formanni Bjartrar framtíðar og nýjum heilbrigðisráðherra, sinn lykil. Óttarr gaf Kristjáni Þór í staðinn bók eftir Gyrði Elíasson og sagði að hann gæti tekið hana með sér inn í nýtt starf sem mennta- og menningarmálaráðherra.
Frétt mbl.is: Telur í og fer svo af stað
Skammt frá tók Þorsteinn Víglundsson, þingmaður Viðreisnar, við lykli að félagsmálaráðuneytinu úr höndum Eyglóar Harðardóttur. Eygló óskaði Þorsteini velfarnaðar í starfi og sagði að hann þekkti vel til málaflokksins en hann er fyrrverandi framkvæmdastjóri Samtaka atvinnulífsins.
Frétt mbl.is: Óskaði Þorsteini velfarnaðar í starfi
Næst var röðin komin að Kristjáni Þór Júlíussyni að fá lyklavöldin sem mennta- og menningarmálaráðherra og var það Illugi Gunnarsson sem annaðist afhendinguna.
Ólöf Nordal afhenti Jóni Gunnarssyni lykilinn að skrifstofu samgönguráðherra. Jón sagði í samtali við mbl.is í gær að tíu ára þingreynsla hans ætti eftir að nýtast honum vel í starfinu.
Frétt mbl.is: Tíu ára þingreynsla gott veganesti
Sigríður Á. Andersen tók við lyklinum að dómsmálaráðuneytinu, einnig úr höndum Ólafar Nordal.
Þorgerður Katrín Gunnarsdóttir tók við lykli að landbúnaðar- og sjávarútvegsráðuneytinu úr höndum Gunnars Braga Sveinssonar, þingmanns Framsóknarflokksins.
Þórdís Kolbrún Reykfjörð Gylfadóttir verður ráðherra ferðamála, iðnaðar og nýsköpunar og afhenti Ragnheiður Elín Árnadóttir henni lykilinn að ráðuneytinu.
Björt Ólafsdóttir, þingmaður Bjartrar framtíðar, fékk lykilinn að ráðuneyti umhverfis- og auðlindamála úr höndum Sigrúnar Magnúsdóttur.
Loks var það Guðlaugur Þór Þórðarson sem fékk lykilinn að utanríkisráðuneytinu hjá Lilju Alferðsdóttur. Guðlaugur hlaut einnig að gjöf forláta Icesave-bolla frá Lilju.
Shakespeare fannst í skókassa
Árshátíð ríkislögreglustjóra haldin í Tékklandi
„Umsátursástand“
„Það þarf að vinna mikinn fjölda upp“
Handteknir eftir myndatöku í Vesturbæjarlaug
Skiptir miklu meira máli en fólk grunar