„Við erum að skoða alla möguleika og gerum allt sem hægt er til að hún finnist.“ Þetta segir lögreglan á höfuðborgarsvæðinu á Facebook-síðu sinni um leitina að Birnu Brjánsdóttur, en fjölmargir kalla nú eftir því að gerð verði allsherjarleit að Birnu.
Enn hefur ekkert spurst til Birnu, en lögreglan lýsti fyrst eftir henni í gærkvöldi. Hún hefur ekki sést síðan á milli klukkan tvö og þrjú aðfaranótt laugardags á skemmtistaðnum Húrra, en síðast var kveikt á síma hennar í Flatahrauni í Hafnarfirði á sjötta tímanum í gærmorgun. Þessi staðsetning er eina vísbendingin um hvarf Birnu.
Móðir Birnu sagði í samtali við mbl.is fyrr í kvöld að hún gangi nú á milli húsa í Flatahrauni með mynd af dóttur sinni og spyrji fólk hvort það hafi séð hana. Vinir dóttur hennar og fleiri ættingjar væru með í för, en engin skipulögð leit væri í gangi að dóttur hennar. Þá hvatti hún alla sem gætu til að taka þátt í leitinni.
Lögreglan fór yfir mál Birnu á stöðufundi klukkan hálfsjö en engar frekari ákvarðanir voru teknar um leit að henni að svo stöddu.
Stofnuð hefur verið Facebook-síða vegna leitarinnar og flykkjast nú þangað inn tilkynningar frá leitarfólki um hvar búið er að leita og ljóst er að leitað er víðs vegar um höfuðborgarsvæðið. Þá velta því sumir upp hvort mögulegt sé að fá leitarhunda til að hjálpa til við leitina og hvort hægt sé að nálgast myndir úr öryggismyndavélum sem gefið geti vísbendingar um ferðir Birnu.
Lögregla lýsti fyrst eftir Birnu í gærkvöldi en ítrekaði auglýsinguna á Facebook-síðu sinni nú síðdegis. Birna er fædd árið 1996, er 170 cm há, um það bil 70 kg og með sítt rauðleitt hár. Birna var klædd í svartar gallabuxur, ljósgráa peysu, svartan flísjakka með hettu og svarta Dr. Martin-skó.
Upplýsingar um ferðir Birnu berist til lögreglu í síma 444-1000.
Uppfært 20:25:
Móðir Birnu setti færslu inn á leitarsíðuna þess efnis að hugsanlega hefði síma Birnu verið stolið aðfaranótt laugardags þar sem hún hætti að senda skilaboð um klukkan 3 um nóttina og sást ganga ein upp Laugarveginn, sem gæti breytt leitarfókusnum töluvert.
Frétt mbl.is: Facebook-síða stofnuð vegna leitar