Lögreglan á höfuðborgarsvæðinu lýsir enn eftir Birnu Brjánsdóttur, sem er fædd árið 1996, en síðast er vitað um ferðir hennar í miðborg Reykjavíkur um kl. 5 aðfaranótt laugardags.
Málið er í algjörum forgangi hjá lögreglu og unnið er úr öllum vísbendingum sem berast. Við rannsóknina hefur lögregla meðal annars skoðað upptökur úr eftirlitsmyndavélum og símagögn, en það hefur ekki skilað árangri enn sem komið er.
Allir þeir sem geta veitt upplýsingar um ferðir Birnu frá því klukkan fimm á laugardagsmorgun eru beðnir um að hafa samband við lögreglu í síma 444-1000.
Björgunarsveitarfólk með leitarhunda hefur verið fengið til aðstoðar við leitina að Birnu. Voru leitarhundar fengnir til að lykta af fötum hennar heima hjá pabba Birnu til að hefja leitina. Þetta kemur fram á Facebook-síðu sem stofnuð hefur verið um leitina.
Birna er 170 cm há, um það bil 70 kg og með sítt rauðleitt hár. Birna var klædd í svartar gallabuxur, ljósgráa peysu, svartan flísjakka með hettu og svarta Dr. Martin skó.
Facebook-síða sem hefur verið stofnuð í kringum leitina